Министер

од admin_kult
Ирена Стефоска – министерка за култура

Ирена Стефоска – министерка за култура

Ирена Стефоска е родена на 16.9.1967 година во Скопје. Таа е доктор на историски науки и редовен професор во Институтот за национална историја при Универзитетот „Св. Кирил и Методиј“ – Скопје.

Стефоска дипломирала на Институтот за класични студии при Филозофскиот факултет во Скопје (1991), магистрирала на Централноевропскиот универзитет во Будимпешта (1994) и на Филозофскиот факултет во Белград (2001), а докторирала на Институтот за историја при Филозофскиот факултет во Скопје (2007).

Во периодот од 2016 до август 2020 година беше пратеник во Собранието на РС Македонија каде што претседаваше со Комисијата за култура и со Групата за соработка со грчкиот Парламент.

Добитник е на Фулбрајтовата стипендија, професор истражувач на Универзитетот „Браун“ во САД (2009 – 2010) и на стипендијата на Фондацијата „Роберт Бош“ (Robert Bosch), на програмата „Historical Dialogue and Accountability“ на Универзитетот „Колумбија“ (зимски семестар 2012).  Алумна на Институтот „Георг Екарт“ во Брауншвајг, Германија, водечка институција во светот за истражување на учебници по историја, географија и по мајчин јазик.

Стефоска е член на меѓународната мрежа „Aliance for Historical Dialogue and Accountability“ при Институтот за човекови права на Универзитетот „Колумбија“ во Њујорк од 2012 година. Носител е и учесник на меѓународни и национални проекти и публикации поврзани со феноменот на нациите и национализмите на Балканот со историските и политичките мотиви на Балканот, со наставата по историја и културите во регионот, а во насока на педагогија и култура на мирот.

Остварила истражувачки престои и одржала многубројни предавања на еминентни универзитети во Европа и во САД, меѓу кои: на Хумболтовиот универзитет во Берлин, на Универзитетот во Чикаго, на Универзитетот „Урбана“ – Илиноис, на Универзитетот „Колумбија“ во Њујорк, во Центарот „Вудро Вилсон“ во Вашингтон, на универзитетите во Регенебург, Грац, Белград, Софија и др. Објавувала во земјите од регионот и во странство, а преведувала стручна литература и белетристика од англиски, српски, латински и од бугарски јазик.

Активно се служи со македонскиот (мајчин) јазик, англискиот јазик, грчкиот јазик, бугарскиот јазик, српскиот јазик, хрватскиот јазик и се служи и има пасивно познавање на францускиот јазик.

Страницата на Министерството за култура на Р.С.Македонија користи т.н."колачиња" со цел да обезбеди подобро корисничко искуство. Прифати Повеќе